Sú pólitíska sýn sem birtist í drögum atvinnuvegaráðherra að nýju frumvarpi um lagareldi gerir Viðreisn að harðsnúnasta stóriðju- og sérhagsmunagæsluflokki seinni tíma.
Afar vont frumvarp síðustu ríkisstjórnar hefur verið gert enn verra. Ekki er einu sinni reynt að þykjast lengur að það eigi að ná utanum sleppingar eldislaxa úr kvíunum, lúsafárið eða gríðarlegan dauða eldisdýranna.
Frumvarpið er klæðskerasniðið að hagsmunum stóru norsku kauphallarfyrirtækjanna þriggja, gegn afkomu bændafjölskyldna um allt land, almannahagsmunum, lífríki og náttúru Íslands.
Ekki er furða að fylgið hrynji af Viðreisn þegar flokkurinn fer af hörku gegn sjónarmiðum kjósenda sinna. Í nýjustu skoðanakönnun Gallups um málefnið kemur fram að 70 prósent stuðningsmanna Viðreisnar eru neikvæð í garð opins sjókvíaeldis, aðeins 5 prósent eru jákvæð í garð iðnaðarins, restin hvorki né.
Andspyrnan er enn meiri í flokki forsætisráðherra, 80 prósent á móti og 5 prósent jákvæð, og línurnar svipaðar meðal stuðningsfólks Flokks fólksins.
Það er sérstakt rannsóknarefni hvernig frumvarpsvinna getur farið svona illa útaf sporinu einsog hefur gerst í þessu tilviki.
Við trúum ekki öðru en að samstarfsflokkar Viðreisnar taki í taumana.
Nýtt frumvarp Hönnu Katrínar Friðrikssonar atvinnuvegaráðherra um lagareldi markar ekki nauðsynlegt skref í átt að sjálfbærri framtíð í atvinnu- og verðmætasköpun á Íslandi.
Þetta segir í tilkynningu frá Landssambandi veiðifélaga en þar lýsir sambandið yfir verulegum vonbrigðum með frumvarpið.
…
Í tilkynningunni segir að frumvarpið sé í litlum tengslum við þá sjálfbæru atvinnu- og verðmætasköpun sem stjórnvöld vilja að eigi sér stað.
„Í stað þess að knýja fram raunveruleg tækniskipti og skýr, bindandi umhverfisviðmið sem draga úr áhættu er í reynd verið að festa í sessi opið sjókvíaeldi með frjóum laxi í fjörðum landsins – framleiðsluhátt sem hefur ítrekað sýnt sig að hafi alvarlegar afleiðingar fyrir villta laxastofna og viðkvæm vistkerfi,“ segir í tilkynningunni.
Sambandið telur að frumvarpið styrki stöðu sjókvíaeldisfyrirtækja í fjörðum landsins án þess að tryggja skýr tímamörk og hvata til að fasa út þá eldisaðferð sem mestum umhverfisáhrifum fylgir.
Bændur farið með veiðirétt í áratugi
Þá minnir sambandið á að bændur og aðrir landeigendur sem fara með veiðirétt í ám hafi í áratugi lagt grunn að sjálfbærri nýtingu og vernd þessara auðlinda með uppbyggingu, verndaraðgerðum og ábyrgri stjórnun veiða.„Sambandið telur óásættanlegt að réttlæta áframhaldandi mengandi starfsemi með því að velta kostnaði og afleiðingum yfir á veiðiréttarhafa og landeigendur, m.a. með ákvæðum sem geta í reynd þrengt að ráðstöfunarrétti og möguleikum landeigenda til að vernda viðkvæm svæði og rekstur,“ segir í tilkynningunni.
…
Sambandið mun skila umsögn í samráðsgátt og hvetur jafnframt „alla sem bera hag villtra laxfiska, náttúrunnar og sjálfbærrar verðmætasköpunar fyrir brjósti til að gera slíkt hið sama.“