Veiðifélag Miðfjarðarár hefur ráðist í stórtækar aðgerðir til að verja meginvatnasvæði árinnar fyrir áhlaupi eldislaxa með tilheyrandi sjúkdómaáhættu og erfðablöndun.
Bændur og aðrir eigendur jarða, þar sem ár með laxi renna um, eru nú tilneyddir í neyðaraðgerðir til að forða villta íslenska laxastofninn frá sömu örlögum og þeim norska.
Þetta eru afleiðingar þess að leyfa dótturfyrirtækjum norskra iðnrisa að leika ábyrgðarlaust lausum hala í íslenskri náttúru.
Um 65 prósent norskra laxastofna eru erfðamengaðir með eldislaxi. Genin úr húsdýrunum valda því að villtu stofnarnir eiga sífellt erfiðara með að bjarga sér í náttúrunni.
Svei þeim sem hafa leyft þessu að gerast þrátt fyrir stöðug varnaðarorð um árabil.
… Garðurinn er í landi Melstaðar, fyrir neðan Teighúsahyl og reistur til að varna eldislaxi uppgöngu í Miðfjarðará, sem hefur löngum verið ein besta laxveiðiá landsins. Garðurinn verður fjarlægður í vetur þar sem hann getur skapað flóðahættu þegar vorleysingar verða.
Í pistli sem formaður Veiðifélags Miðfjarðarár sendi á félagsmenn rakti hann ástæður þess að farið var í þessa aðgerð. Sú fyrsta var að verja meginvatnasvæði árinnar fyrir eldislaxi með tilheyrandi sjúkdómaáhættu og erfðablöndun. Í öðru lagi að vernda veiðigæði meginhluta árinnar út líðandi veiðitímabil. Í þriðja lagi: „Sýna samstöðu í orði og verki og um leið að við höfum hugsjón og ástríðu þegar kemur að Miðfjarðará og villtum laxastofni hennar og að við viljum vernda hann og ána með ráðum og dáð,“ skrifaði Magnús.
Nú er unnið hörðum höndum að því að loka aðgengi eldislax að Haukadalsvatni og hafa fundist grindur til verksins, en þær voru áður notaðar til að loka Norðlingafljóti. Víðar eru upp hugmyndir um lokanir á laxveiðiám og hafa Sporðaköst heimildir fyrir því að slíka vinna sem þegar komin af stað í að minnsta kosti tveimur öðrum laxveiðiám.
Fundur sem Landssamband veiðifélaga hélt með sínum félagsmönnum og leigutökum laxveiðiáa, síðastliðið fimmtudagskvöld taldi tilefni til að bregðast hratt við til að hámarka þann mögulega skaða sem blasir við. Enginn veit umfang málsins, hversu margir eldislaxar eru á sveimi í sjó í leit að ferskvatni til hrygningar í. Staðan í Haukadalsá er alvarleg að mati sérfræðinga, þar sem þegar eru staðfestir fleiri eldislaxar en náðust 2023 þegar strokulaxar héldu innreið í fjölmargar laxveiðiár á Íslandi.
Það vissu allir að mikið var af hnúðlaxi í Haukadalsá og enginn ruglast á 55 sentímetra hnúðlaxi og 80 til 90 sentímetra eldislaxi. 85 hnúðlaxar eru bókaðir í veiðibók Haukadalsár.
Eftir því sem Sporðaköst komast næst eru norskir kafarar á leið til landsins og fyrsta stopp er Haukadalsá.