Rúmlega þrjár vikur eru nú liðnar frá því framlengdur frestur sem stjórnvöld fengu til að svara ESA rann út. Eftirlitsstofnun EFTA samningsins vill fá skýringar á tilteknum atriðum vegna útgáfu leyfa fyrir sjókvíaeldi við Ísland á undanförnum árum.
Þetta eru vægast sagt ósannfærandi vinnubrögð stjórnvalda. Þarna er setið á upplýsingum sem við hjá Íslenska náttúruverndarsjóðnum og fleiri þurfum að fá að sjá til að geta skilað inn athugasemdum við lagareldisfrumvarp atvinnuvegaráðherra.
Atvinnuveganefnd Alþingis sendi frumvarpið frá sér til umsagnar skömmu fyrir páska og gaf frest til 10. apríl fyrir skil á umsögnum.
Af hverju vilja stjórnvöld standa svona illa að verki?
Morgunblaðið fjallar um þetta nýjasta dæmi sleifarlagsstjórnsýslu í sjókvíaeldismálum:
Íslensk stjórnvöld hafa enn ekki svarað upplýsingabeiðni ESA, eftirlitsstofnunar EFTA, um leyfi til sjókvíaeldis hér á landi sem veitt voru án þess að flokkun á ástandi vatnshlota lægi fyrir, sem gengur gegn því sem vatnatilskipun ESB kveður á um.
ESA sendi upplýsingabeiðnina til íslenskra stjórnvalda 30. janúar og er hún til umfjöllunar í umhverfis-, orku- og loftslagsráðuneytinu. Frestur til að svara beiðninni var gefinn til 2. mars.
Stjórnvöld urðu ekki við þeim fresti. Talsmaður Íslenska náttúruverndarsjóðsins gagnrýnir vinnubrögð stjórnvalda og segir þau sitja á mikilvægum upplýsingum um málið á meðan þau gefi sjálf afar knappan umsagnarfrest um frumvarp um lagareldi.