Haldi einhver að það sé tilviljun að þrjú stóru sjókvíaeldisfyrirtækin hér hafi aldrei borgað tekjuskatt á Íslandi á undanförnum áratugum (utan eitt, einu sinni og það hverfandi upphæð) þá er það ótrúlegur barnaskapur.
Þessi frétt sem birtist í Fiskifréttum í vikunni og er unnin upp úr norskum fjölmiðlum segir allt sem segja þarf:
„Á sama tíma borga sum stórfyrirtæki, eins og Mowi, Salmar, Sinkaberg og Grieg Seafood, næstum því núll krónur,“ segir innanbúðarkona í norska sjókvíaeldinu.
Mowi og Salmar eru meirihlutaeigendur í Arctic Fish og Arnarlaxi sem starfa á Vestfjörðum og Kaldvík á Austfjörðum er líka í norskri meirihlutaeigu.
Meira úr frétt Fiskifrétta:
„Finn Kinserdal hjá Norska hagfræðiskólanum segir að fljótlega eftir að laxaskatturinn hafi verið kynntur hafi fjöldi skattasérfræðinga í þjónustu stóru eldisfyrirtækjanna kannað leiðir til að minnka áhrifin. Meðal annars hafi fyrirtækjum verið skipt upp þannig að þau fyrirtækjanna sem greiða eigi skattinn séu látin skila minni hagnaði. Þá sé laxinn látinn vera skemur í sjó en áður því við þann tíma sé skatturinn miðaður.
„Þau gætu líka hafa aðlagað verðið því eldisfyrirtækin selja lax til sinna eigin fyrirtækja sem síðan selja fiskinn áfram,“ rekur Kinserdal áfram í NRK. Stjórnvöld hafi einfaldlega vanmetið aðlögunarhæfni stóru fyrirtækjanna.“
Og nú erum við með hér á Íslandi atvinnuvegaráðherra, Hönnu Katrínu Friðriksson, sem virðist hafa falið lögfræðiteymi sjókvíaeldisfyrirtækis að semja stóran hluta kaflans um sjókvíaeldið í drögum að frumvarpi um lagareldi sem hún hefur lagt fram.
Hvernig getur þetta gerst?
Meira á vef Fiskifrétta:
Laxaskattur sem yfirvöld í Noregi kynntu haustið 2022 og töldu að myndi skila 3.650 milljónum til 3.800 milljóna norskra króna á ári, jafnvirði nærri 50 milljarða íslenskra króna, hefur síður en svo reynst slík tekjulind.
Að því er norska ríkisútvarpið (NRK) segir fékk norska ríkið á árinu 2023 868 milljónir norskra króna í kassann vegna laxaskattsins og á árinu 2024 aðeins 469 milljónir. Á árinu 2024 hafi verið fluttur út eldislax að verðmæti yfir 120 milljarða norskra króna, eða jafnvirði um 1.500 milljarða íslenskra króna. Skatturinn eigi að tryggja tekjur til nærsamfélaganna þar sem eldið fer fram. …