Í nýbirtu uppgjöri Arnarlax kemur fram að fyrirtækið tapaði tvöþúsund sjöhundruð tuttugu og sex milljónum króna í fyrra. Það þýðir tap upp á um 7,5 milljónir króna alla daga ársins 2025.
Nokkur atriði til að hafa í huga:
- Arnarlax er ekki ungt fyrirtæki. Það hefur verið með rekstur frá 2007 (Fjarðarlax sem Arnarlax tók síðar yfir).
- Á þessum nítján árum hefur Arnarlax aðeins tvisvar greitt tekjuskatt á Íslandi.
- Þetta gríðarlega uppsafnaða tap gerir það afar ólíklegt að Arnarlax borgi tekjuskatt á næstunni.
- Í drögum atvinnuvegaráðherra að nýjum lögum er gert ráð fyrir að afkomutengja gjaldtöku fyrir afnot sjókvíaeldisfyrirtækjanna að fjörðum þjóðarinnar. Í því samhengi er rétt að rifja upp að norskir fjölmiðlar sögðu frá því fyrir áramót að tekjur af breyttum laxaskatti þar í landi hafa verið langt undir áætlunum. Ástæðan er að fljótlega eftir að nýi laxaskatturinn var kynntur hafi fjöldi skattasérfræðinga í þjónustu stóru eldisfyrirtækjanna kannað leiðir til að minnka áhrifin.
Skattasniðganga er sem sagt hluti af viðskiptamódeli norsku sjókvíaeldisrisanna, sem eru einmitt meirihlutaeigendur sjókvíaeldisfyrirtækjanna hér.
Atvinnuvegaráðherra hefur ekki gefið skynsamlega skýringu á því af hverju hún vill auka veg þessa iðnaðar hér.
Á íslenskum vinnumarkaði eru um 217.000 störf. Ársverk í sjókvíeldi eru um 330 samkvæmt ársreikningum fyrirtækjanna sjálfra. Það er 0,15% af störfum á landinu. Til samanburðar byggja eigendur um 2.500 lögbýla í sveitum landsins tilveru fjölskyldna sinna á tekjum af sjálfbærri stangveiði.
