Lausnin fyrir þá sem vilja stunda laxeldi í sjó er til: „Það eru lokuð kerfi í sjó.“
Ingólfur Ásgeirsson, stofnandi Íslenska náttúruverndarsjóðsins, ræðir í Dagmálum á MBL í dag af hverju opið netapokaeldi getur aldrei gengið í sjó án þess að valda meiriháttar skaða á lífríki og umhverfinu.
„Lausnin er komin. Það eru lokuð kerfi í sjó. Þetta er nýtilkomið. Norðmenn eru búnir að átta sig á því að þeir komast ekki lengra með þetta. Þorskurinn í fjörðunum er horfinn. Rækjan er horfin. Þetta er algert „umhverfisdisaster“ í Noregi,“ segir stofnandi Icelandic Wildlife fund (IWF), Ingólfur Ásgeirsson í Dagmálum Morgunblaðsins í dag. Ingólfur ræðir þar strokulaxa úr sjókvíum sem fundist hafa í Haukadalsá og margir hafa miklar áhyggjur af að sé upphafið að endurtekningu á umhverfisslysinu sem varð haustið 2023 þegar hundruð eldislaxa gengu upp í fjölmargar laxveiðiár víðsvegar um land.
Ingólfur segir þessa nýju lausn vera eitthvað sem gagnist öllum. Um sé að ræða einskonar síló sem eru lokuð. Fóðurnýting sé mun betri. Laxadauði aðeins brot af því sem er í netapokunum og stærsta málið, það sleppur enginn fiskur. Úrgangur er endurnýttur og þessi aðferð sé margfalt umhverfisvænni en það eldi sem nú er stundað við Íslandsstrendur. Hann segir þessa lausn vera ódýrari en að byggja eldisaðstöðu á landi. …