Fyrstu fjóra mánuði ársins drápust rúmlega 1,1 milljón eldislaxa í sjókvíum við Ísland. Það er um það bil 19-föld stærð villta íslenska laxastofnsins.
Tölur yfir laxadauðann í sjókvíunum er hægt að sjá á Mælaborði fiskeldis sem er birt á vefsvæði Matvælastofnunar (MAST) en tölurnar eru uppfærðar fyrir mánuðinn á undan undir lok þess næsta.
Laxadauðinn sjókvíunum er hlutfallslega töluvert meiri hér en í sjókvíaeldi við Noreg, en þar þykir þó staðan óásættanleg.
Norsku fyrirtækin og stjórnvöld heita á hverju ári bót og betrun en svo gerist ekki neitt. Ástæðan er fyrst og fremst sú að lög og reglugerðir eru sniðin að hagsmunum fyrirtækjanna en ekki velferð eldisdýranna. Það á við um Noreg og Ísland.
Fagráð MAST um dýravelferð fjallaði í fyrsta skipti um þetta skelfilega ástand á fundi nú í vor. Löngu tímabært var að þetta málefni væri rætt þar. MAST ber beinlínis skylda til að gæta að dýravelferð. Frammistaða sjókvíeldisfyrirtækjanna í þeim efnum er ömurleg.
Sjókvíaeldi á laxi er óboðleg aðferð við matvælaframleiðslu.
Ljósmyndin sem hér fylgir sýnir löndun á eldislaxi sem stráféll í sjókvíum í Dýrafirði í fyrra, vegna bakteríusýkinga og vetrarsára. Hver vilja leggja sér til munns matvæli sem eru framleidd með þessum hætti? Myndina tók Veiga Grétarsdóttir.