Við hjá Íslenska náttúruverndarsjóðnum tökum alfarið undir að sjókvíaeldi á laxi í opnum netapokum verði bannað við Ísland.
Í ályktun á nýafstöðnum aðalfundi Landssambands veiðifélaga var kallað eftir því að sjókvíeldisfyrirtækin verið gerð ábyrg fyrir því tjóni sem þau valda og að þeim verði gert skylt að vera með umhverfistryggingar til að bæta skaðann.
Ótrúlegt en satt þá hafa stjórnvöld ekki gengið svo um hnútana að sjókvíaeldisfyrirtækin beri þá ábyrgð skilyrðislaust, þótt enginn vafi leiki á á tjóninu sem þau hafa nú þegar valdið.
Ályktun LV um sjókvíaeldi var m.a. birt í umfjöllun mbl.is um aðalfundinn:
„Aðalfundur Landssambands veiðifélaga haldinn 26.-27. apríl 2025 fordæmir það hermdarverk sem unnið er á villtum laxastofni Íslands í skjóli stjórnvalda. Við lýsum ábyrgð á hendur stjórnvöldum fyrir alvarlega atlögu að íslenskri náttúru. Við krefjumst þess að náttúrulegir laxastofnar hafi forgang, séu verndaðir og hvergi sé gengið á rétt þeirra. Engar mótvægisaðgerðir eru til sem koma í veg fyrir skaðann af opnu sjókvíaeldi. Hvergi í heiminum hefur tekist að reka laxeldi í opnum sjókvíum án þess að stórskaða villta laxstofna. Því leggur fundurinn áherslu á eftirfarandi:
a) Í opnum sjókvíum verði aðeins heimilt að ala ófrjóan lax þar til opið sjókvíaeldi verði bannað með lögum.
b) Eyjafjörður, Öxarfjörður, Seyðisfjörður, Stöðvarfjörður og Breiðdalsvík verði friðuð fyrir sjókvíaeldi.
c) Eldisfyrirtæki verði gerð ábyrg fyrir því tjóni sem þau valda og verði m.a. skylt að vera með umhverfistryggingar sem bæti þann skaða sem fiskeldi veldur.
d) Að stjórn Umhverfissjóðs sjókvíaeldis verði mönnuð að meirihluta með félögum tilnefndum af Landssambandi veiðifélaga og úthlutanir á hans vegum verði m.a. til að bæta fyrir þau inngrip sem sjókvíaeldi hefur valdið náttúrulegum laxastofnum á Íslandi.
Þá lýsir aðalfundur Landssambands veiðifélaga fullum stuðningi við baráttu Seyðfirðinga gegn laxeldi í firðinum.“