Nú er búið að reka norska doktorinn í fiskiheilsu sem hefur verið að stýra starfsemi sjókvíaeldisfyrirtækisins Kaldvíkur í um eitt ár. Ástandið hefur lengi verið skelfilegt í rekstri Kaldvíkur. Á undanförnum mánuðum hefur fyrirtækið bæði verið sektað og kært til lögreglu fyrir meðferðina á eldisdýrum sínum.
Í Berufirði drápust í maí rúmlega 5% af eldislaxi í sjókvíum Kaldvíkur. Í júní drapst 6,7% til viðbótar.
Tölur fyrir júlí hafa ekki verið birtar enn.
Það á að fangelsa fólk sem stendur svona að verki og svipta fyrirtæki leyfum fyrir dýrahaldi.
Mbl.is fjallar um brotthvarf Rikardsen.
Stjórn eldisfyrirtækisins Kaldvíkur og Roy-Tore Rikardsen hafa komist að samkomulagi um að forstjóri Kaldvíkur láti tafarlaust af störfum. Þetta kemur fram í yfirlýsingu sem fyrirtækið sendi frá sér rétt í þessu. Vidar Aspehaug verður starfandi forstjóri þar til nýr forstjóri verður ráðinn í stöðuna.
Aspehaug hóf störf hjá Kaldvík árið 2022 og hefur síðustu þrjú ár verið í framkvæmdastjórn félagsins og hafði yfirumsjón með teymum sem vinna að fiskheilbrigði og gæðaeftirliti. Aspehaug er með doktorsgráðu í fiskheilbrigði frá Háskólanum í Bergen og er stofnandi og fyrrverandi forstjóri og viðskiptastjóri PatoGen AS sem er ein virtasta rannsóknarstofa á sviði fiskheilbrigðis Noregs.
„Við erum þakklát fyrir framlag Roy-Tore á því umbreytingartímabili sem verið hefur eftir starfslok fyrrverandi forstjóra og stofnanda fyrirtækisins,“ segir Asle Rønning, stjórnarformaður Kaldvíkur.