Svona vinna sjókvíaeldisfyrirtækin. Kaupa til sín stjórnmálamenn og starfsfólk ráðuneyta. Tilgangurinn er augljós. Að hafa áhrif á laga- og reglugerðaumhverfi iðnaðarins.
Það er sorgleg staða fyrir íslenskt samfélag að þetta fái að viðgangast.
Málavextir eru þeir að srifstofustjóri sem stýrði sviði fiskeldismála í Atvinnuvega- og nýsköpunarráðuneytinu stóð í ýmiskonar samskiptum Arnarlax í aðdraganda setningar nýrra laga um laxeldi. Yfirmönnum skrifstofustjórans þóttu samskiptin óeðlileg. Skrifstofustjórinn sendi m.a. ráðgjafa hjá Arnarlax, Baldri Pálma Erlingssyni, sem áður hafði starfað í ráðuneytinu, drög að reglugerð um fiskeldi frá skrifstofstjóranum nokkrum mánuðum áður en þau voru birt opinberlega.
Þetta kemur fram í dómi í skaðabótamáli skrifstofustjórans, Jóhanns Guðmundssonar, gegn íslenska ríkinu. RÚV sagði frá dómnum .
Í umfjöllun Heimildarinnar um þetta segir m.a.:
“Jóhann lét fresta birtingu nýrra laga um fiskeldi sumarið 2019 með því að hringja í Stjórnartíðindi og biðja um þetta. Með því að láta fresta birtingu laganna kom Jóhann í veg fyrir að lögin öðlust gildi. Þannig gekk hann erinda laxeldisfyrirtækja, meðal annars Arnarlax, sem gátu þá skilað inn í gögnum um ný laxeldisáform sín á grundvelli eldri laga um fiskeldi sem ekki voru eins og ströng og nýju lögin sem hefðu átt að hafa tekið gildi ef Jóhann hefði staðið rétt að birtingu þeirra. …
Í nýlegri skýrslu Ríkisendurskoðunar um laxeldi var fjallað um þetta inngrip Jóhanns var mál hans sagt vera „alvarlegt“ og var þar upplýst að háttsemi hans hefði verið kærð til lögreglunnar. „Ríkisendurskoðun telur alvarlegt að birtingu laganna hafi verið frestað með þeim hætti sem raun ber vitni. Umrædd töf var til þess fallinn að grafa undan tiltrú almennings og annarra hagsmunaaðila á að jafnræðis og gagnsæis væri gætt af hálfu stjórnvalda.“
Rannsóknin á máli Jóhanns var látin niður falla hjá Héraðssaksóknara þar sem ekki þótti sýnt að hann hafi ætlað að brjóta af sér í starfi.