Ef norska umferðarljósakerfið væri notað hér hefði sjókvíaeldi í Dýrafirði verið meira eða minna á rauðu jósi frá 2017, svo slæmt hefur ástandið verið.
Norðmenn nota það kerfi til framleiðslustýringar í sjókvíaeldi. Á rauðu ljósi er skylda að slátra upp úr kvíunum. Er það gert til að vernda villta stofna af laxi, sjóbirtingi og sjóbleikju en lúsin hefur hörmuleg áhrif á þá.
Eitrið sem sjókvíaeldisfyrirtækin nota gegn lúsinni hefur svo mjög skaðleg áhrif á lífríkið. Lúsin er skeldýr og eitrið drepur önnur skeldýr hafsins líka, marfló, rækju og humar. Þetta er skelfilegur iðnaður.
Sjókvíaeldi er óboðleg aðferð við matvælaframleiðslu.
Í umfjöllun Morgunblaðsins segir m.a.:
Laxalús hefur tekið að fjölga undanfarin misseri á laxfiskum í sjókvíum á Vestfjörðum. Samkvæmt mælaborði fiskeldis var í nóvember að meðaltali 1,41 kvenlús á hverjum fiski í sjókvíum á Íslandi. Talan er hins vegar mun hærri þar sem lúsin er þar sem hana er alla jafna ekki að finna á Austfjörðum.
Ekki liggja fyrir tölur fyrir landshluta í nóvember en talan fyrir Vestfirði á október er 0,94 kvenlús á fiski. Það er ekki ýkja mikið þar sem áhættumörk í mörgum ríkjum eru 1,5 til 3 fullorðnar lýs á hverjum fiski.
Staðan er hins vegar allt önnur þegar skoðuð er staðan eftir fjörðum og sést að í Dýrafirði voru 3,94 kvenlýs á hverjum fiski í október.
Í bréfi til Ísafjarðarbæjar dagsettu 12. október síðastliðinn tilkynnti Arctic Fish að þörf væri á að meðhöndla gegn laxalús með emamectin benzoate eða svokölluðu „slice“ í kvíastæðum við Hvannadal í Tálknafirði, Kvígindisdal í Patreksfirði og Hvestudal í Arnarfirði. Átti meðhöndlun að vera lokið 21. nóvember.